Декан

Мусозода С.М. – декани факультети фарматсевтӣ, доктори илмҳои фарматсевтӣ, профессор.

Мусозода Сафол Мираҳмад соли 1981 мактаби миёнаро бо медали тилло хатм намуда, ба факултети фарматсевтии Донишкадаи давлатии тиббии Тоҷикистон ба номи Абуали ибни Сино дохил шудааст. Фаъолияти меҳнатиашро соли 1986 ба ҳайси лаборанти калони кафедраи технологияи дору ва фармакологияи Донишкадаи номбурда шурӯъ намудааст. Солҳои 1988-1991 таҳсилро дар аспирантура, дар кафедраи технологияи саноатии доруи академияи тиббии шаҳри Москва ба номи И.М. Сеченов идома дода, соли 1991 барои дарёфти унвони илмии номзади илмҳои фарматсевтӣ дар мавзӯи «Разработка лекарственных форм репаративного действия на основе инозитолсодержащих фосфолипидов» рисола дифоъ намудааст. Солҳои 2011 -2014 дар докторантура, дар кафедраи фарматсияи иҷтимоии Донишгоҳи миллии фарматсевтии Украина (ш. Харков) таҳсил карда, соли 2014 дар мавзӯи «Теоретические, судебно-фармацевтические и организационно-правовые основы совершенствования государственного контроля за оборотом наркотических средств в Республике Таджикистан» рисолаи докторӣ дифоъ намуда, соҳиби унвони доктори илмҳои фарматсевтӣ гардидааст. Дар вазифаҳои сардори Раёсати назорати сифати доруи Вазорати тандурустии Ҷумҳурии Тоҷикистон, сардори шӯъбаи назорати муомилоти қонунии маводи нашъаовари Агентии назорати маводи нашъаовари назди Президенти Ҷумҳурии Тоҷикистон, мушовири Ташкилоти байналмилалии «Дорусозон бидуни марз», сардори Лабораторияи марказии Хадамоти гумруки назди Ҳукумати Ҷумҳурии Тоҷикистон, мудири кафедраи технология ва биотехнологияи фарматсевтии Донишгоҳи миллии Тоҷикистон кор кардааст. Айни ҳол декани факултети фарматсевтии Донишгоҳи миллии Тоҷикистон аст. Узви ҳайати таҳририяи маҷаллаҳои илмии «Социальная фармация в здравоохранении» (Украина), «Ретсепт» (Украина ва Белорусия) ва «Илм ва фановарӣ» (Тоҷикистон) мебошад.

Муаллифи зиёда аз 200 корҳои илмӣ, 1 китоби дарсӣ (Технологияи фарматсевтӣ, Душанбе, 2016), 2 монография («Гюрзотоксин», «Ровесник независимости»), 14 патент, воситаҳои таълимӣ (аз ҷумла Практикум по аптечной технологии лекарств, Харьков 2016, Сборник тестов по аптечной технологии лекарств, Душанбе, 2016, Руководство к лабораторным занятиям по аптечной технологии лекарств, Душанбе, 2019), дастурҳои методӣ ва мақолаҳои илмӣ буда, бо як қатор мукофотҳо, аз ҷумла Медали хизмати шоиста (2018), Аълочии тандурустии Тоҷикистон (1995), Аълочии Хадамоти гумруки Тоҷикистон (2009), Ифтихорномаи Ҳизби халқӣ – демократии Тоҷикистон, Ифтихорномаи Донишгоҳи миллии Тоҷикистон, Медали «20 солагии Агентии назорати маводи нашъаовари назди Президенти Ҷумҳурии Тоҷикистон» (2019), Ифтихорномаи Хадамоти назорати давлатии тандурустӣ ва ҳифзи иҷтимоии аҳолии Ҷумҳурии Тоҷикистон (2019) сарфароз гардонида шудааст. Барандаи ҷоизаи Созмони ҷавонони Тоҷикистон ба номи Исмоили Сомони дар соҳаи илм ва техника (1999) мебошад.